Nod Prosiect Cynhaeaf Newydd yw ychwanegu gwerth at fwyd lleol a gynhyrchir ym Mhowys. Gall hyn olygu dod o hyd i ffyrdd arloesol o farchnata cynnyrch traddodiadol, fel cig dafad, neu ddatblygu cnydau sy'n newydd i Bowys, er enghraifft llus a madarch egsotig. Nod prosiectau eraill yw datblygu marchnadoedd newydd ar gyfer cynhyrchion bwyd lleol ym Mhowys; darparu cefnogaeth dechnegol i gynhyrchwyr bwyd; ac annog cydweithio i ddatrys problemau fel sut i ddosbarthu bwyd lleol.

Mae Prosiect Cynhaeaf Newydd yn gweithio mewn partneriaeth â busnesau a sefydliadau perthnasol i gynnig cymorth ag ymchwilio, datblygu cynnyrch, marchnata a sicrhau cyhoeddusrwydd. Mae Glasu hefyd yn gweithredu fel hwylusydd, trwy gynnal cyfarfodydd i ddwyn ynghyd unigolion sydd â diddordeb i drafod datblygu syniadau.

Ymhlith prosiectau ar y gweill mae:

• Prosiect Perllannau Powys - cynyddu ymwybyddiaeth o'r perllannau ym Mhowys. Fel rhan o'r prosiect, mae Meddyg Perllan wedi'i benodi i gynnig arbenigedd, mae pobl yn cael eu hyfforddi i reoli eu perllannau ffrwythau ac rydym yn ymchwilio i'r posibiliadau o ychwanegu gwerth at ffrwythau perllan.

• Amaethyddiaeth a Gefnogir gan y Gymuned - datblygu cysylltiadau rhwng defnyddwyr lleol a'r bobl sy'n cynhyrchu eu bwyd. Bu Glasu yn cefnogi datblygiad saith cynllun blychau llysiau ledled Powys sydd wedi bod yn llwyddiannus iawn.

• Cyrchu Arloesedd - rheoli cronfa sy'n caniatu ymchwilio i syniadau arloesol a'u rhoi ar brawf. Er enghraifft, ymchwil i achlysuron 'Bwydydd Gwyllt Powys' ac 'O'r Gât i'r Plât', gan ailgysylltu bwyd â fferm leol ei darddiad.

Os oes gennych chi unrhyw syniadau ar gyfer prosiectau yn y dyfodol, os hoffech chi gael mwy o wybodaeth am brosiectau sydd eisoes yn bodoli, neu os oes angen unrhyw gymorth arall arnoch chi, cysylltwch â ni.