Nod Prosiect Storfa Cefn Gwlad yw datblygu cynhyrchion arloesol o ddefnyddiau fel coed/pren, planhigion, gwlân, crwyn defaid, calch a gwydr. Trwy weithio mewn partneriaeth â busnesau a sefydliadau perthnasol, ein nod yw 'ychwanegu gwerth' at ddefnyddiau lleol heb fod yn fwyd trwy gynnig cymorth ag ymchwilio, datblygu cynnyrch, marchnata a sicrhau cyhoeddusrwydd. Mae gan yr holl brosiectau rydym ni'n gweithio arnyn nhw thema gynaliadwy, boed hynny'n ffynonellu defnyddiau crai neu sicrhau bod prosiectau a ddatblygir yn gynaliadwy yn y tymor hir.

Mae Glasu hefyd yn gweithredu fel hwylusydd, trwy gynnal cyfarfodydd i ddwyn ynghyd unigolion sydd â diddordeb i drafod datblygu syniadau.

Dyma enghreifftiau o brosiectau sydd ar y gweill ar hyn o bryd:

• Helyg ym Mhowys - cynnal treialon maes gyda helyg ar gyfer crefftau a basgedi, yn edrych ar ddatblygu cynnyrch ac yn cyrchu marchnadoedd newydd ar gyfer cynhyrchion helyg.

• Y Ddafad Gyfan II - edrych ar farchnadoedd amgen a gwella dyluniad cynhyrchion gwlân e.e. dillad. Mae'r prosiect yma hefyd yn edrych ar wahanol fridiau o ddefaid er mwyn cael gwlân o ansawdd mwy coeth.

• Defnyddiau Adeiladu Amgen - Bydd y prosiect yn datblygu cynhyrchion adeiladu nad ydyn nhw'n niweidio'r amgylchedd cymaint, yn ymchwilio iddyn nhw ac yn mynd â nhw i'r farchnad. Bydd pwyslais arbennig ar loriau ynysu o galch-crit, a gwydr wedi'i ailgylchu fel dewis amgen i dywod mewn plastr.

• Cyrchu Arloesedd - Rheoli cronfa sy'n caniatáu ar gyfer syniadau gwirioneddol arloesol wrth ychwanegu gwerth at gynhyrchion heb fod yn fwyd. Ymhlith enghreifftiau o brosiectau mae: Tybiau Poeth o Ffynidwydd Douglas a Datblygu Gwellt Toi ym Mhowys.

• Ailgylchu gwastraff coed - ymchwilio i nodweddion compost sglodion pren a datblygu cymysgeddau compost ar gyfer cymwysiadau penodol e.e. meithrinfeydd coed.