Prosiect ar y cyd â 2 grŵp LEADER+ arall yw Datblygu'r Diwydiant Gwlân a Chrwyn Defaid ym Mhowys, sef Fells and Dales yn Cumbria a LEADER+ Gogledd Antrim yng Ngogledd Iwerddon. Nod y prosiect yw cynorthwyo â datblygiad y diwydiant gwlân a chrwyn defaid ym mhob un o'r tair ardal. Mae'r prosiect yn cynnwys elfennau y mae pob un o'r tri grŵp yn gweithio arnyn nhw (Gweithredu ar y Cyd) ac elfennau sy'n digwydd yn eu hardaloedd eu hunain.

Bydd y gweithredu ar y cyd yn cynnwys cyfarfodydd rheolaidd rhwng grwpiau i rannu arfer da a syniadau, sefydlu archif o grwyn defaid o bob ardal, nifer o seminarau i gynyddu ymwybyddiaeth o grwyn defaid a datblygiad protocol cadwraeth arfer gorau ar gyfer gwlân ar grwyn defaid.

Bydd y gweithgareddau canlynol hefyd yn cael eu cynnal dan y prosiect yma -

Gwyrthwlân Cymru
Uchafbwynt newydd Gŵyl Tyddynwyr a Gerddi ym Maes Sioe Frenhinol Cymru Llanelwedd, Llanfair-ym-Muallt. Achlysur newydd cyffrous yw GWYRTHWLÂN CYMRU i ddwyn pobl ynghyd o ymhell ac agos sy'n rhannu awch am wlân a ffibrau naturiol, ac i arddangos ansawdd ac amlbwrpasedd rhagorol ffibrau, cynhyrchion a sgiliau sy'n ffurfio asgwrn cefn y casgliad trawiadol o ddiwydiannau cysylltiedig yng Nghymru.

Â'r nod o ychwanegu at elfennau o'r ŵyl sydd eisoes yn bodoli, bydd GWYRTHWLÂN CYMRU yn cynnwys arddangosfeydd, ymgyrchoedd hybu, arddangosiadau a stondinau masnach gan ddetholiad eang o sefydliadau, cynhyrchwyr a chrefftau yn ogystal ag YSGOL WLÂN lle bydd gwybodaeth, arddangosiadau a dosbarthiadau ar gael. Hefyd fe fydd arddangosfa o waith enillwyr cystadleuaeth GWYRTH GWLÂN.

Mae mwy o wybodaeth am yr achlysur, y stondinau neu'r gystadleuaeth, a cheisiadau am stondinau, ar gael o swyddfa Glasu. Neu, os hoffech gael eich cynnwys ar y rhestr bostio, cysylltwch â ni.