Select your Language
Increase or decrease font size

Prosiectau Cyfredol

Mae Twristiaeth Arloesol am wella perfformiad economaidd a lefelau incwm mewn twristiaeth wledig. Mae cymorth ariannol ar gael ar gyfer gweithgareddau fel:
  • Ymchwil neu i dreialu gwasanaethau trafnidiaeth ar gyfer ymwelwyr
  • I dreialu rhaglenni cyfryngau newydd a gwasanaethau gwybodaeth arloesol, er mwyn rhoi cyhoeddusrwydd i Bowys fel cyrchfan twristiaeth gynaliadwy
  • I dreialu digwyddiadau iaith, diwylliant neu fwyd newydd
  • I dreialu ‘canolbwyntiau’ twristiaeth ac ymchwil i gyfleusterau llety newydd neu i dreialu syniadau newydd ar gyfer twristiaeth bywyd gwyllt a gweithgareddau twristiaeth arloesol
  • Ar gyfer astudiaethau achos a phrosiectau enghreifftiol, mentora, ymchwil farchnad ac ymweliadau ymarfer gorau
Dyma rai o’r prosiectau presennol, ac sy’n cael eu hariannu gan Dwristiaeth Arloesol:
  • Heartfelt Work
  • Astudiaeth rheoli trafnidiaeth dwristiaeth Talybont ar Wysg
  • Gwersylla Bron yn Wyllt
  • Mid Wales Art Experience
  • Ffilmiau Naws am Le i Bowys
  • Asedau Naturiol Dyffryn Gwy
Dyma rai enghreifftiau o brosiectau y mae Glasu wedi eu cynorthwyo yn y cynllun busnes diwethaf rhwng 2008-2011:

Cynllun Busnes Twristiaeth Werdd
Gwyddom fod ystyriaethau amgylcheddol yn ffactor cynyddol bwysig pan fydd ymwelwyr yn penderfynu prynu pethau. Gydag amrywiol labelau fel twristiaeth werdd, eco-dwristiaeth, twristiaeth gyfrifol neu dwristiaeth gynaliadwy, nod llawer o’r mentrau hyn yw cynorthwyo a datblygu diwydiant twristiaeth i fwynhau costau is ac effeithio llai ar lefel amgylcheddol / gymdeithasol tra’n cynnig profiad gwych i ymwelwyr.
O’r ardaloedd hynny lle mae’r prosiectau hyn wedi llwyddo’n barod, dyma rai o’r gwersi ar gyfer datblygu’r farchnad hon yn llwyddiannus:
  • Sicrhau eglurder ac enw da i’r honiadau a wneir gan eco-gynhyrchion / eco-wasanaethau – ac sy’n defnyddio rhyw fath o feincnodi neu ardystiad.
  • Hyrwyddo a marchnata wedi’i dargedu.
  • Cymorth wedi’i gyd-gysylltu.
Nod y Cynllun hwn yw dysgu o’r gwersi hyn a gweithredu cynllun eco-ardystio fel ffocws ar gyfer: cynnwys busnesau twristiaeth; codi eu hymwybyddiaeth o’r amgylchedd; eu cymell i geisio lleihau eu costau a’u heffaith ar yr amgylchedd; hyrwyddo a marchnata i gael mynediad at y farchnad werdd newydd hon.
Mae’r prosiect hwn yn cael ei ddarparu mewn cydweithrediad â phrosiect Collabor8 Parc Cenedlaethol Bannau Brycheinioger mwyn:
  • Cynnig mwy o synergedd ac arbedion gyda’r pecynnau cymorth a marchnata
  • Cysoni strategaethau rhanbarthol / cenedlaethol / rhyngwladol ehangach
  • Sicrhau dull cyffredin o weithredu ar draws ardal ddaearyddol eang
OutdoorGirlz
Prosiect yn ymchwilio i, datblygu a marchnata pecyn o 6 llwybr beicio mynydd wedi eu tywys, i ddarparu’n benodol ar gyfer merched sy’n beicio mynydd, gyda’r llwybrau hefyd yn mynd heibio i fywyd gwyllt, bwyd lleol a llefydd aros gwyrdd.
Am fwy o wybodaeth, cysylltwch â Glasu neu ewch i wefan OutdoorGirlz.

e-lwybr Glaslyn
Llwybr bywyd gwyllt gwyrdd, thematig, gyda dehongli traddodiadol ac electronig (clywedol), gan Ymddiriedolaeth Natur Sir Drefaldwyn.
 
Nod y Prosiect yw datblygu, fel prosiect peilot, llwybr thematig wedi’i gefnogi gan wybodaeth a dehongli y gellir eu lawrlwytho, ac sy’n cysylltu:
·         Cofeb Wynfford Vaughan-Thomas (ar y Ffordd Fynydd rhwng Llanidloes a Machynlleth) a;
·         Gwarchodfa Natur Glaslyn; a
·         Mannau lle mae gwaith lliniaru newid hinsawdd yn cael ei wneud ar Ystâd Bugeilyn (fel rhan o Brosiect Pumlumon).
 
Prosiect adfer cynefin mawr yw Prosiect Pumlumon sy’n cael ei redeg gan Ymddiriedolaethau Natur Cymru ac wedi’i noddi gan Lywodraeth Cymru, Asiantaeth yr Amgylchedd, Cyngor Cefn Gwlad Cymru, y Comisiwn Coedwigaeth ac eraill.
Yn 2006 cyflawnwyd astudiaeth gwmpasu economaidd a chymdeithasol i sefydlu’r angen am Brosiect Pumlumon ac i ganfod beth oedd y cyfleoedd. Yn ôl yr astudiaeth, mae angen mathau newydd o lety ymwelwyr sydd wedi ei gysylltu’n well i dreftadaeth naturiol yr ardal, ynghyd â gwaith dehongli a mynediad gwell at y dreftadaeth hon i ymwelwyr a phreswylwyr lleol fel ei gilydd. Cadarnhawyd hyn drwy ymgynghori i ddilyn.
 
Bydd y prosiect hwn yn cyflwyno’r gwaith sydd wrthi’n cael ei wneud yng Nglaslyn a Bugeilyn, i’r cyhoedd – ymwelwyr a phreswylwyr lleol fel ei gilydd. Mae’r gwaith yn cynnwys lliniaru yn erbyn y newid yn yr hinsawdd (blocio ffosydd, pori gyda gwartheg traddodiadol, addasu’r trefniadau pori, adfer grug ayb) yn ogystal â gwaith cadwraeth natur mwy confensiynol (y grugiar goch, y boda tinwyn ayb). Bydd dehongli’n dangos i bobl pa mor bwysig yw’r gwaith hwn, a sut mae ffermwyr lleol yn ein helpu i’w gyflawni.
Bydd y llwybr arfaethedig yn ychwanegiad gwerthfawr at seilwaith ymwelwyr yr ardal a hefyd yn rhan bwysig o Lwybr Cylchol Pumlumon (wrthi’n cael ei ddatblygu), a ddefnyddir i gael ymwelwyr i wario mwy yn yr ardal ac felly i greu mwy o swyddi. 
Hwn fydd e-lwybr cyntaf Canolbarth Cymru, a bydd gwybodaeth am lwybrau, dehongli, hanesion lleol, mewnbwn gan ffermwyr lleol, recordiadau gan Vaughan-Thomas, a hyd yn oed barddoniaeth a miwsig lleol ar gael o ddewislen ar y wefan ac ar gael i’w lawrlwytho i ffonau symudol, chwaraewyr i-player a chwaraewyr cyfryngau symudol eraill. 

Llwybr Natur a Chelfyddyd Shakespeare
Llwybr natur a phecyn o ddigwyddiadau thematig a ddarperir gan Shakespeare Link. Mae’r llwybr yn defnyddio gwaith Shakespeare i integreiddio a hybu bywyd gwyllt, diwylliant a chelfyddyd, fferm organig ac ynni adnewyddadwy lleol i ymwelwyr.  
Bydd y prosiect yn cael ei ddatblygu o gwmpas Theatr y Glôb Byw yn Penlanole, fferm organig a gwarchodfa natur breifat gofrestredig sy’n swatio’n glud yn Nyffryn Gwy Uchaf, 3 milltir i’r de o dref Rhaeadr.
Mae gwaith Shakespeare yn llawn dop o gyfeiriadau at fflora a ffawna, bywyd gwyllt a bywyd gwledig. Nod y prosiect yw cyfuno’r cyfeiriadau hyn yn llwybr natur addysgiadol unigryw o gwmpas y fferm. Gyda chymorth gan Ymddiriedolaeth Natur Maesyfed a’r ecolegydd lleol, Ursula Hill Bowen, mae Shakespeare Link wedi mapio llwybr ¾ milltir sy’n ymgorffori:
  • coetir brodorol (sy’n garped o eirlysiau ar hyn o bryd);
  • siwrne drwy ganol gwrych pren bocs hynafol;
  • coed ar ffurf y cymeriadau Titania & Prospero;
  • pwll dŵr llawn bywyd gwyllt;
  • cerfluniau helyg a llif gadwyn (gan artist lleol) o gymeriadau Shakespeare;
  • pont ar draws nant hudolus;
  • cuddfan adar / bywyd gwyllt;
  • anifeiliaid fferm;
  • dolydd gwair / blodau gwyllt traddodiadol
  • tyrbin gwynt a phaneli solar ffotofoltaig
Bydd y llwybr yn defnyddio amrywiol ddulliau o ddysgu, cymryd rhan ac ennill profiad, gan gynnwys taflenni / pamffledi a byrddau dehongli traddodiadol ar gyfer y llwybr yn ogystal â theithiau tywys / digwyddiadau, “dyfyniadau” ar gyfer eich ffonau symudol; helfeydd trysor naturiol ac astudiaethau a gemâu arloesol eraill i bawb o bob oed.
I hwyluso mynediad i ystod eang o ymwelwyr, bydd dyluniad y llwybr yn cynnwys dewis o 6 llwybr cylchol 250-300 llath, yn ogystal â’r prif lwybr ¾ milltir. Bydd byrddau dehongli, mynegbyst a thaflenni yn rhoi cyfle i ymwelwyr grwydro’n hamddenol ar hyd y llwybr yn eu hamser eu hunain ar ddiwrnodau digwyddiad a diwrnodau agored. 
  • Yn ogystal â seilwaith ffisegol y llwybr, bydd yr atyniadau pellach yn y pecyn i ymwelwyr yn canolbwyntio ar raglen o ddigwyddiadau:
  • Gweithdai thematig, diwrnodau agored a theithiau tywys;
  • Bydd y llwybr ar agor i ymwelwyr o’r cyhoedd am 3 diwrnod y mis o leiaf rhwng Ebrill a Medi, fel arfer gydag un diwrnod yn benodol ar gyfer tywys;
  • Yn ystod y tymor cyntaf, bydd 6 diwrnod natur penodol yn ogystal â gweithdai thematig eraill.
  • Digwyddiadau ategol – mae’r rhaglen wedi’i datblygu mewn cysylltiad ag atyniadau lleol eraill fel Gigrin Farm, Ymddiriedolaeth Cwm Elan ayb i osgoi cystadlu am ddigwyddiadau a gynhelir ar yr un diwrnod.
Bygis y Bannau
Arolwg teithio twristiaeth yw’r prosiect hwn i weld pa mor ymarferol fyddai treialu, ac i oleuo dyluniad, bygis (B-Bugs) awyr agored, hwyl i’w gyrru ac wedi eu pweru gan drydan, a fyddai ar gael i’w llogi i ymwelwyr i Barc Cenedlaethol Bannau Brycheiniog dros yr haf 2011.
Mae Parc Cenedlaethol Bannau Brycheiniog yn gweithio i ddod yn un o’r prif gyrchfannau eco-dwristiaeth. Yn anffodus, mae 91% o’r ymwelwyr i’r Parc yn teithio yma mewn ceir ar y funud ac mae’r ceir dan sylw’n aml yn geir teulu mawr mwy drud-ar-garbon ac, yn gynyddol, yn gerbydau ῾gwersylla’.
Hyd yma prif ffocws y Parc Cenedlaethol yw gwella opsiynau trafnidiaeth gyhoeddus gonfensiynol i ymwelwyr. Mae cynlluniau o’r fath wedi gweithio’n dda i ymwelwyr undydd yn enwedig. Ond mae angen rhoi sylw i ofynion ymwelwyr arhosiad hir, yn enwedig rhai sy’n aros mewn tai hunan-ddarpar ac sy’n gyrru cerbydau mwy drud-ar-garbon. Y nod yw ymchwilio i ddarparu dull trafnidiaeth gyhoeddus wahanol ochr yn ochr â’r drafnidiaeth gonfensiynol, pe byddai modd denu rhai ymwelwyr i logi cerbyd trydan ysgafn, cyflymder isel i’w cludo o gwmpas y parc yn ystod eu arhosiad.
Mae’r opsiynau ar gyfer cerbydau trydan yn eithaf prin: mae gwneuthurwyr ceir yn canolbwyntio ar ddatblygu ceir trydan sy’n perfformio’n debyg (o ran cyflymder, pellter, capasiti a chysur) i geir petrol neu ddisel modern. Mae’r ceir cyntaf i ddod allan yn aruthrol o ddrud ac yn rhy gymhleth i’r siwrneiau 5-10 milltir sy’n cyfrannu fwyaf at filltiroedd blynyddol pobl. Ar hyn o bryd mae’r ceir trydan rhataf yn y DU oddeutu £11-12k ac nid ydynt yn geir da iawn. Mae canlyniadau rhagarweiniol prosiect ceir Ynni Gwyrdd Talybont (sy’n defnyddio ceir trydan rhatach) yn awgrymu y byddai car “pob dydd” rhatach ac ysgafnach yn llawer gwell ar gyfer tripiau byr rhwng 10-20 milltir. Mae pobl yn gwerthfawrogi’r siwrne ddistaw carbon isel ond hefyd yn mwynhau profiad gyrru gwahanol mewn car sy’n edrych yn eithaf ffynci!
 
Mae syniad y “Beacons Buggies” (B-Bug) yn seiliedig ar opsiwn gwahanol i’r car trydan arferol. Mae bygis petrol cyfreithlon ar y ffordd o gwmpas heddiw, ac yn costio rhwng £3k - £5k. Nod y prosiect hwn yw ymchwilio i weld a ellid datblygu fersiwn trydanol o un o’r bygis trydan presennol hyn, am tua’r un pris. NI FYDDAI yn gar. Byddai’n ddrafftiog ac yn wlyb ond byddai hefyd yn ffynci ac yn hwyl i’w yrru ac yn costio tua thraean y gost o redeg y car trydan rhataf ar y farchnad. Byddai ond angen ei addasu (e.e. i gadw’r tywydd allan) pe bai rhywun am ei wneud yn fwy fel car. Bydd y treial yn 2011 yn arbrawf i weld a fyddai cerbyd o’r fath yn apelio at dwristiaid ac a fyddai’n economaidd hyfyw.
 
Gallai bygi trydanol gynnig opsiwn trafnidiaeth gynaliadwy arall i ymwelwyr, yn ogystal â’r potensial i fod yn atyniad newydd i dwristiaid ynddo’i hun. Fodd bynnag, cyn symud ymlaen ymhellach gydag unrhyw beilot ar gyfer y cerbyd hwn, mae angen sefydlu pa ganran o siwrneiau mewn ceir a gyflawnir gan ymwelwyr sy’n aros ym Mannau Brycheiniog sy’n llai na 25-30 milltir y dydd. Os yw ymwelwyr i’r Parc yn aml yn teithio mwy na 25-30 milltir y dydd yn eu ceir, yna ni fyddai pwynt treialu’r syniad hwn. Mae’r un peth yn wir os ydynt yn tueddu i ddod â beiciau, canŵs neu gyfarpar swmpus arall gyda nhw ar eu tripiau undydd.

Am fwy o wybodaeth ewch i: www.beaconsbuggy.wordpress.com

Swyddog Prosiect


Cliff Webb

ffȏn 01982 552224
ebost swyddog prosiect